1st John

1st John Chapter 5

Abeg click here to share dis post

Faith Inside Di Son of God

1. Everi-pesin wey believe sey Jesus, na di Christ na Baba-God pikin, and any-pesin wey love di Fada, love hin pikin sef.

2. Naso we go take know sey we love Baba-God children: To love Baba-God and to do wetin he tell us to do.

3. To love Baba-God mean sey you dey obey wetin he tok. And wetin he tell us to do—no be like load for us.

4. Any-pesin wey be Baba-God pikin dey win di world—and we get dis victory tru awa faith.

5. Who be dat pesin wey dey win di world—except di pesin wey believe sey Jesus na Baba-God Son?

6. And Jesus Christ nahin come by water, and blood—no be only by water, but by water plus blood. And di Spirit wey be true—dey confam dis tins.

7. Na three witnesses dey for heaven: Di Fada, di Word, plus di Holy Spirit; and dis three na one.

8. And na three witness dey for earth: di Spirit, di water plus di blood; and di three of dem agree as one.

9. Since we accept man words, we fit surely believe Baba-God words wey great pass; becos dis na di testimoni wey he don give us about hin Son.

10. Any-pesin wey believe in di Son of God—know for dia heart sey dis words na true. Any- pesin wey no believe Baba-God don turn am to liar, becos e no believe wetin Baba-God tok about hin Son.

11. And na dis be di yarnings; Baba-God don give us everlasting life wey dey for inside hin Son.

12. Pesin wey accept di Son—get life; and pesin wey no accept Baba-God Son—no get life.

Las-las Yarnings

13. I dey write dis tins to una wey believe in di name of Baba-God Son, so dat una go know sey una get life wey dey last forever, and so dat una go kontinu to believe in di name of Baba-God Son.

14. And we get dis full- mind for Baba-God, sey he dey hear us—any time we ask anytin—wey go make belle sweet am.

15. And since we know sey he dey hear us any time we ask am, we know sey he don already do wetin we ask from am.

16. If any-pesin see hin broda dey commit sin wey no lead to death, make he pray, and Baba-God go give life to pipo wey commit sin wey no dey lead to death. But e get sin wey dey lead to death—I no tok sey make you pray about dat one.

17. Any wrong tin wey pesin dey do na sin, and no be everi sin dey lead to death.

18. We know sey any-pesin wey be Baba-God pikin no dey live inside sin again; and Baba-God pikin dey keep demsef, and evil no fit touch dem.

19. We know sey we belong to Baba-God, and na di evil one dey control di whole world.

20. And we know sey Baba-God Son don land, and he don give us understanding, so dat we go fit know di true God. And now we dey inside di tru God, inside hin Son—Jesus Christ. Dis na di true God, and everlasting life.

21. My pikin, komot hand from idols. Amen.

Loading

Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website