1st Peter

1st Peter Chapter 4

Abeg click here to share dis post

To Live For Baba-God

1. Since Christ suffer for earth, now you sef must dey ready to suffer like Christ, becos pesin wey don suffer for body—don stop to commit sin,

2. so dat, you no dey live di rest of your life for di evil tins wey brekete for man heart, instead, you go live to do di tins wey Baba-God want.

3. We don waste enuff time before-before, dey do di evil tins wey world-pipo want make we do—like; sex anyhow, corrupt mind, jogodo, flexing anyhow, mezebu, plus di tufiakwa of worshipping idols.

4. Dem your old padi dey surprise as you no dey use rush wit dem to waste una energy, so dem dey bad-mouth you.

5. Dem go explain demsef to Baba-God, wey dey ready to judge everi-pesin, both dead or alive.

6. Nahin make dem preach di good news to those pipo wey don kpeme now, so dat dem go recieve judgement like men wey dey alive, but make dem live based-on Baba-God inside di spirit.

7. Di ending of everitin don dey reach. So make you serious, and dey watch inside your prayers.

8. And on top everitin, love unasef wella, becos love dey cover plenty sins.

9. Welcome pipo to your house wit-out grumbling.

10. Baba-God don give everi one of una gifts, so use your gift take serve one anoda—as good keeper of Baba-God grace wey brekete.

11. If any-pesin dey tok, make he tok as pesin wey dey yarn as oracle of Baba-God. If any- pesin dey serve, make he serve wit di strength wey Baba-God dey give—so dat for inside everitin, dem go fit praise Baba-God tru Jesus Christ. All glory and pawa belong to Baba-God for ever and ever. Amen.

To Suffer Becos Pesin Na Christian

12. My dear, no surprise for di hot wahala wey go test you—as if one kain strange tin dey happun to you.

13. But happy for di level of suffer-head wey you dey share wit Christ, so dat your happiness sef go burku wen hin levels show-face.

14. If dem insult you becos of Christ name, you get blessings, becos di Spirit of glory, and Baba-God rest upon you.

15. If you dey suffer, make e no be becos you be killer, or tiff, or evil pesin, or becos you shuuk- mouth for oda pipo mata.

16. So, if you suffer as Christian, make shame no catch you, but praise Baba-God for dis mata.

17. E don reach time wey judgement go start from inside di house of Baba-God; and if e first start wit us, wetin you tink sey go happun to those pipo wey no obey Baba-God word?

18. Now, “If e dey hard for good pipo to get salvation, wetin go con happun to world-pipo plus sinners?”

19. So make those pipo wey dey suffer based-on Baba-God will, commit dia soul to di faithful God wey make dem, and kontinu to dey do good.

Loading

Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website