2nd John

2nd John Chapter 1

Abeg click here to share dis post

1. From di senior-man. To di madam wey dem choose, plus her pikin, wey I love inside truth—and no be only me, but everi-pesin wey don sabi di truth—

2. becos of di truth wey dey live inside us, and wey go dey wit us forever:

3. Make grace, mercy plus peace from Baba-God di Fada, and from Oga Jesus Christ—di Son of di Fada, kontinu to dey wit us for inside truth, and love.

4. My belle dey sweet me well-well sey some of your pikin don dey waka inside truth just as di Fada sey make we dey do.

5. Abeg madam, I no dey write you new command, but na di one wey we don know from starting—sey make we love one anoda.

6. Na love be dis: to obey wetin Baba-God tell us to do. Dis na wetin he command, sey as you don hear from di starting, dey waka inside am.

7. I dey tok dis one becos, many wayo-pipo wey no gree sey Jesus Christ come as human being—don go inside di world. Dat kain pesin na wayo-pesin and antichrist.

8. Shine your eyes so dat we no go lose those tins wey we don hustle for, but make we receive full blessings.

9. Any-pesin wey commit sin and wey waka komot from di teaching of Christ, no get Baba-God inside am; any-pesin wey kontinu inside di teaching, get both di Fada, plus di Son.

10. If any-pesin come meet you, and he no carry dis teaching come, no let am enta your house, and no greet am.

11. Any-pesin wey greet am—dey share inside hin evil work.

12. I get plenty tins to write to you, but I no wan use paper and ink. Instead, I hope to come visit una, and follow una tok face to face—so dat awa happiness go complete.

13. Greeting from di pikin of una sista —wey Baba-God don choose. Amen.


Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website