James Chapter 5

Abeg click here to share dis post

Warning For Bigman Wey Dey Oppress Pipo

1. Now listen, una wey get moni well-well, make una cry and shout becos of di yawa wey go soon come jam una.

2. Your moni don corrupt, and insect don chop your cloth finish.

3. Your gold and silver don rust, dem go be witness against you, and dem go chop your body like faya. You don gada plenty moni for di last days.

4. See! Di cry of di pipo wey work for your farm—wey you no gree pay dem wit your ojoro, and di cry of di pipo wey work for your farm for harvest—don reach Almighty God ears.

5. You don live expensive life for earth—wit flexing, and your heart don turn to ororbor for di day of killing.

6. You don condemn and kill innocent pesin wey no dey against you.

Patience Inside Suffer-head

7. So, make una dey patient, until Jesus go show. See as farmer take dey wait for di land to produce e beta fruit, and as di farmer take dey wait wit patience—for di first and last rains.

8. Make una sef dey patient, and stand gidigbam, becos awa Oga Jesus Christ no go tey come.

9. Make una no dey grumble about each oda, or you go dey condemned. Di judge dey for doormot!

10. My pipo, wen you face suffer-suffer, use di prophets wey yarn wit Baba-God name as example of patience.

11. We count those pipo wey dey endure as pipo wey get blessings. Una don hear as Job take endure, and una see wetin Baba-God do for am las-las—sey Baba-God dey kind, and he dey sorry-for pesin.

12. Inside everitin my brodas, make una no swear—no swear wit heaven, or wit earth, or wit any oda oath. Make your, “Yes” be “Yes,” and your “No” be “No,” or you go fall inside judgement.

Di Prayer of Faith

13. Abi any one of una dey suffer? Make e pray. Abi any-pesin dey happy? Make e sing song of praises [psalms].

14. Abi any one of una dey sick? Make he call di senior-men of di church to pray for am, con anoint am wit ororo—in di name of di Oga.

15. And di prayer wey dem pray wit faith go make di sick pesin dey alright; Baba-God go raise am up, and if di pesin don commit any sin, Baba-God go forgive am.

16. Confess una sins to unasef, and pray for unasef so dat una go heal. Di serious prayer of good man get beta pawa, and e dey make tins happun.

17. Elijah na man like us, but he pray well-well make rain no fall, and rain no gree fall for di land for three and half years.

18. He con pray again, naso heaven con bring rain, and di land produce e fruits.

19. My pipo, if one of una waka komot from di truth, and pesin con carry am come back,

20. Make he know sey: any- pesin wey make sinner komot from di error of hin way—go save am from death, and he don cover plenty-plenty sins.


Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website