Revelation

Revelation Chapter 2

Abeg click here to share dis post

To Di Church Wey Dey For Ephesus

1. “Write dis letter to di angel of di church wey dey for Ephesus: Dis na di message of di pesin wey hold di seven stars for hin right hand, and wey dey waka among di seven golden lampstands:

2. I know una hustle, una hard work, and una endurance. I know sey una no fit dey wit evil pipo, una don test those pipo wey claim to be apostles—but dem no be, una con see sey dem be fake.

3. Una don endure, con get patience, una don hustle becos of my name, and una neva taya.

4. But I go hold dis one against una: una don fashi una first love.

5. Remember where una don fall from, make una repent, and do di Tins wey una first dey do. If una no gree repent, I go come meet una sharp-sharp, con komot una lampstand from where e dey—among di churches.

6. But dis one favour una: una no like di tins wey di Nicolaitans dey do, me sef no like dem.

7. Pesin wey get ear, make e hear wetin di Spirit dey follow di churches dey tok. To di pesin wey succeed, I go let am chop from di tree of life—wey dey for inside Baba-God paradise.

To Di Church Wey Dey For Smyrna

8. “Write dis letter to di angel of di church wey dey for Smyrna: Dis na di message of di pesin wey be di First and Last, wey die, con come back to life again.

9. I know una hustle, suffer-suffer, and una poverty—but una still rich! I know di bad-mouth of those pipo wey dey claim sey dem be Jews, but dem no be Jews—but dem be church of Satan.

10. No fear anytin wey una go suffer. See, I dey tell una sey di devil go put some of una for prison—to test una, and dem go show una pepper for ten days. But stay faithful, even if dem wan kill una, and I go give una crown of life.

11. Any-pesin wey get ear make e listen to wetin di Spirit dey tell di churches. Any-pesin wey succeed, di second death no go fit wound am.

To Di Church Wey Dey Pergamum

12. “Write dis letter to di angel of di church wey dey Pergamum: Dis na di message of di pesin wey get di sharp sword—wey get two side.

13. I know una hustle, and where una dey stay—for where Satan king-chair dey. But una still dey true to my name. Una no fashi una faith in me, even for di days of Antipas, my faithful witness, wey dem kill for una city—where Satan dey stay.

14. As e be so, I get small tins against una: Una get pipo for there wey hold Balaam teaching—wey teach Balak how to whyne di pipo of Israel to commit sin—as dem chop food wey dem sacrifice to idols, and to sex anyhow.

15. Naso una still get some pipo wey hold di teachings of di Nicolaitans—wey I hate sef.

16. So make una repent! Or I go soon come meet una, con fight dem wit di sword wey dey for my mouth.

17. Any-pesin wey get ear, make e hear wetin di Spirit dey tell di churches. Any-pesin wey succeed, I go give am chop from di secret manna. I go give am white stone sef, wit new name wey dem write on top, wey no-pesin know—except di pesin wey receive am.

To Di Church Wey Dey Thyatira

18. “Write dis letter to di angel of di church wey dey for Thyatira: Dis na di message of di Son of Baba-God, wey hin eyes dey shine like faya wey dey burn, and wey hin leg be like shining bronze.

19. I know una hustle, and love, una service, plus faith, and patience, plus una hustle; una dey do pass wetin una first dey do.

20. But as e be so, I get dis tin against una: Una accept dat woman Jezebel, wey call hersef prophetess. Wetin she dey teach don make my servants miss- road—to dey sex anyhow, and to chop food wey dem sacrifice to idols.

21. I don give her chance to repent of her anyhow-sex, but she no wan gree repent.

22. So I go put her for sickbed, and I go make those pipo wey sleep wit her, suffer well-well unless dem repent from her evil ways.

23. I go nack her pikin die. Naso all di churches go con know sey na me dey look inside pipo heart plus mind, and I go pay all of una based-on una works.

24. Now I dey tell di rest of una for Thyatira, to una wey neva follow her fake teaching—wey dem dey call “Di deep tins of Satan.” I no go put any oda load for una head,

25. except sey make una hold wetin una get—tight, until I come.

26. Any-pesin wey succeed, con do wetin I want till di end, I go give am pawa to control nations—

27. He go rule dem wit hin iron staff; and break dem to pieces like clay pot.’ Dem go receive di same pawa wey I receive from my Papa.

28. I go give am di morning star.

29. Any-pesin wey get ear, make e hear wetin di Spirit dey tell di churches.

Loading

Abeg click here to share dis post

Pidgin Bible na did new Bible translation for Pidgin English Language. Di Bible dey easy to read and understand and e get Pidgin dictionary sef, wey go epp pipo understand more.

Leave a Reply

Your email address will not be published.

No copy from dis website