Proverbs Chapter 29

Happiness For Di Man Wey Dey Keep Di Law

1. Pesin wey no wan gree change afta plenty
   pipo don warn am—go soon fall, and notin
   go fit save am again.
2. Wen beta pesin dey rule, pipo go dey jolly;
   wen wicked men dey rule, pipo go dey cry.
3. Any-pesin wey love wisdom dey make hin
   papa happy, but pesin wey get plenty ashawo
   as hin padi—go waste hin moni finish.
4. Na wit justice king take dey maintain hin
   kontri, but king wey get longatrot for egunje
   (bribe) go bring hin kontri down.
5. Any-pesin wey dey whyne hin neighbour
   wit sweet- mouth dey set trap for am.
6. Evil man sin go catch am like trap, but
   good man go sing and jolly.
7. Good man dey reason justice for poor
   pipo, but wicked man no understand dat kain
   mata.
8. Mumu pipo fit cos faya for full city, but
   wise men dey make pesin wey dey
   vex—cool down.
9. If wise man dey argue wit mugu, di mugu
   go dey para and dey laff, and settlement no
   go dey.
10. Men wey like to shed blood—hate men
    wey get clean- hands, but good men dey fyne
    way to epp pipo wey get clean-hands.
11. Mumu pesin dey show hinsef wen he dey
    vex, but wise man dey control hinsef.
12. If Igwe (King) dey listen to lies, all hin
    officials go wicked well- well.
13. Poor man and pesin wey dey oppress am
    resemble demsef; na Baba-God dey give dia
    eyes light.
14. King wey dey judge poor pipo wit truth,
    hin king-chair go last forever.
15. Punisment plus correction dey make
    pesin wise, but pikin wey dem just leave like
    dat—go fall hin mama hand.
16. Wen wicked men dey shine—sin sef go
    shine, but good man go see as dem go take
    fall yakata.
17. Correct your pikin, and dem go give you peace; eehn…e go make your soul jolly.
18. Where vision no dey, di pipo go kpeme;
    but blessings for di pesin wey dey keep di
    law.
19. You no-fit just use ordinary tok take
    correct your servant; even if he understand,
    he no go ansa you.
20. Mugu get hope pass man wey no dey
    reason before he tok.
21. Servant wey pesin dey pet from small go
    turn to hin pikin las-las.
22. Man wey dey vex—dey cos quarrel, and
    pesin wey dey para go do plenty wrong tins.
23. Man wey dey carry- shoulder-up go fall,
    but man wey dey do jeje—go gain respect.
24. Pesin wey epp tiff, hate hin own life, he
    don swear to tok true, but he no-fit tok
    anytin!
25. To dey fear man—na trap; but any-pesin
    wey trust Baba-God go dey safe.
26. Plenty pipo wan meet king for epp, but
    justice for man—dey
    come from Baba-God.
27. Good man no like pesin wey dey lie;
    wicked pipo no like pesin wey get clean-
    hand.