Proverbs Chapter 12

To Love Discipline Plus Knowledge

1. Any-pesin wey love teaching—love to
   learn, but any- pesin wey hate correction na
   dondi.
2. Good man go get favour from Baba-God,
   but Baba-God dey condemn korni-korni
   man.
3. Man no-fit make am wit evil way, but good
   man root no go ever komot for ground.
4. Wife wey get beta character na crown for
   her husband, but woman wey dey bring
   disgrace—be like bone wey don spoil.
5. Good man tinking na correct tinking, but
   wicked man advice na wayo.
6. Evil man words na to shed blood, but good
   man words dey save dem.
7. Dem go overthrow wicked men, and dem
   no go ever dey again, but good man family
   go stand gidigbam.
8. Dem go cut-cap for man based-on hin
   wisdom, but pipo hate men wit bend-bend
   mind.
9. E beta make you dey low-key and make
   you get servant, dan make you dey pretend to be somebody—but you no get food.
10. Good man dey care for wetin hin animal
    need, but di beta tin wey wicked man fit
    do—na wickedness.
11. Pesin wey hustle for hin land go get food
    burku, but any-pesin wey dey use hin take
    life play—no get-sense.
12. Wicked men wan obtain wetin evil men
    obtain, but good pipo root go prosper.
13. Badbelle pesin miss- yarn dey put am for
    wahala, but good man dey escape from
    palava.
14. Di wise words from man lips—nahin dey
    make am belleful wit beta tins, and di
    handwork of man go pay am.
15. Mugu dey always feel sey hin way dey
    right, but wise men dey hear advice.
16. Mugu dey quick vex, but man wey get-
    sense go use- style cover shame—even if
    dem insult am.
17. Pesin wey get clean-heart dey tok true,
    but fake witness dey tok lie.
18. Miss-yarn dey shuuk like knife, but wise
    man tongue dey heal.
19. Truth dey last forever, but tongue wey
    dey lie—no dey last.
20. Wayo nahin brekete for di mind of pipo
    wey dey plan evil tins, but happiness dey for
    pipo wey dey promote peace.
21. No yawa go meet pipo wey get clean-
    heart, but yawa nahin burku for badbelle
    pipo.
22. Mouth wey dey tok lie na tufiakwa for
    Baba-God, but he like men wey dey tok true.
23. Wise man dey keep wetin he know, but
    mumu heart dey show dia kolomentality.
24. Hand wey dey hustle go rule, but pipo
    wey lazy—go las-las do slave labour.
25. Worry-worry dey bring man down, but
    beta words go make am happy.
26. Good man suppose use jeje choose hin
    padi, becos badbelle pipo way—dey make
    dem waka miss-road.
27. Lazy man no get time to roast hin bush-
    meat wey he catch, but di life of serious man
    na business.
28. Life dey for di beta way; for dat road wey
    dey lead to everlasting life.