- We don hear wit awa ears, Oh Baba-God, awa palee don yarn us wetin you do
for dia time, for olden day.
- You use you hand pursue di nations comot and you con put our palee for di
land; your scata those pipo con make our papa prosper.
- No be wit dia sword nahin dem take win di land, and no be di weapon wey dem
get nahin make dem win; but na your right hand, your hand, plus di light wey dey
for your face. You love dem.
- Na you be my King and my God, na you tok sey Jacob must get victory.
- You go give us power to push awa enemies go back. Wit your name, we match
our enemies for ground.
- I no dey trust my bow, no be my sword go make me win;
- but na you dey make us win awa enemies, you make shame catch awa
enemies.
- Na Baba-God we dey use dey make-mouth from morning to night and we go
praise your name forever.
- But now you don bone us and you don make us dey low level; you no dey
escort our army again.
- You make us shift go back from our enemies, and our enemies don suck us
dry.
- Na you let dem wan chop us like sheep and you don scata us for everi nation.
- You sell your pipo for chicken-change; you no gain anytin as you sell us.
- You don make awa neighbor dey look us like disgrace, dem dey yab and dem
dey laff us.
- You don use us as example for nations, and pipo dey shake dia head for awa
mata.
- Shame full my eyes everiday. Shame cover my face
- as those pipo wey hate me and wey no like me at all dey wyne me becos of
my enemies wey don tok sey dem must revenge.
- All dis tin happun to us even though we no fashi you, or sey we no keep your
covenant wit truth.
- Our heart no look back; our leg no comot for your way.
- But you nack us down con make jackals dey pursue us, and you con cover us
wit deep darkness.
- If we bin don fashi Baba-God name, or worship foreign gods,
- seybe Baba-God for know, since you know di secret wey dey my heart?
- But becos of you, we dey face death from morning till night; dem dey reason
us as sheep wey dem wan go kill.
- Wakeup Oh God! Why you dey sleep? Wake up by yourself! No fashi us
forever.
- Why you dey hide your face con forget awa deep pain and oppression?
- Dem don bring us down to dust; our body dey rub ground.
- Rise up come epp us; save us becos of your love wey no dey fail
Post Views: 44
