Proverbs Chapter 27

No Dey Make-mouth About Tomorrow

1. No dey make-mouth about tomorrow,
   becos you no know wetin di day go carry
   come.
2. Make anoda pesin praise you—no dey
   praise yoursef; make e be pesin wey no know
   you, no be from your own lips.
3. Stone heavy and sand get weight, but wen
   mugu para—e dey heavy pass di two of dem.
4. Vex no good, and to para be like wave, but
   who fit stand
   jealousy?
5. E beta make pesin correct you for where
   everi-pesin dey, dan make pesin show you
   love for secret.
6. E beta make your correct padi wound you,
   but kiss from your enemy na wayo.
7. Pesin wey don belleful go hate honey, but
   even sometin wey bitter—dey sweet for
   hungry pesin mouth.
8. Like bird wey don fly komot from e bird-
   house, nahin be man wey run komot from
   house.
9. Ororo and perfume dey make heart jolly,
   naso beta advice of correct padi dey make
   heart jolly.
10. No fashi your padi and your papa padi,
    and no dey go your broda house only wen
    yawa gas—neighbour wey dey near beta
    pass broda wey dey far-far.
11. Wise up my pikin, and make my heart
    happy; so dat I go fit ansa pesin wey dey yab
    me.
12. Man wey get-sense go see danger, and he
    go hide hin head, but mumu go still dey
    carry- go and he go suffer am.
13. Collect collateral from pesin wey go do
    guarantor for jjc; hold hin property if he do
    am for strange woman.
14. If man dey raise hin voice anyhow—dey
    bless hin neighbour for early mor-mor, pipo
    fit go reason am as curse.
15. Woman wey like quarrel—be like rain
    wey dey fall small-small—wey no wan gree
    stop.
16. To control her be like sey you wan catch
    breeze, or e be like sey you wan hold ororo
    wit your hand.
17. As iron take dey sharp iron, naso man take dey sharp anoda man mind.
18. Any-pesin wey take care of tree—go
    chop from e fruit, and any-pesin wey serve
    hin oga go get hin pay.
19. As water take dey show pesin face like
    mirror, naso man heart take dey show as di
    man really be.
20. Death and grave no dey belleful, naso
    man eyes sef no dey belleful.
21. Na heat dem take dey shine silver plus
    gold, but na wetin oda pipo dey tok about
    pesin nahin dey give am levels.
22. Even if you grind mugu for mortar wit
    pestle—like seed, hin yeye ways no go still
    komot from am.
23. Make sure sey you dey take care of your
    animals, look your animals well-well;
24. becos moni no dey last forever, and
    crown no dey last for all generations.
25. Wen dem don cut di grass, and new ones
    don dey grow, and dem harvest all di herbs
    from di hills,
26. di sheep go provide una wit cloth, una go
    use di moni from una goats—take buy land.
27. You go get enuff milk to feed you and
    your family, and your house-girls.