Proverbs Chapter 18

Baba-God Name Na Strong Tall-house

1. Man wey no dey relate wit pipo—dey do
   only wetin dey for hin mind; he no dey gree
   for any beta reasoning.
2. Mumu no like to understand, but dem only
   like to tok wetin dey for dia mind.
3. Wickedness dey bring badbelle, and
   shame dey bring disgrace.
4. Di words from man mouth be like water wey deep well-well, and di well of wisdom be like water wey dey flow.
5. E no good to do partiality for wicked pipo,
   or make you do ojoro wen you dey judge
   man wey get clean-heart.
6. Mumu pesin mouth dey put am for
   wahala, and hin mouth dey invite beating.
7. Mumu mouth nahin dey make am fall, and
   hin lips na trap for hin soul.
8. Tatafo words be like small food wey dey
   enta body.
9. Pesin wey dey slack for hin business na di
   broda of pesin wey dey scata tins.
10. Baba-God name na strong tall-house,
    pipo wey get clean-heart dey run enta
    inside—and dem go dey safe.
11. Rich man wealth na hin strong city; and
    dem dey reason am like high wall.
12. Before man fall, he dey always feel-big
    for hin heart, and pesin must humble before
    dem go give am respect.
13. Any-pesin wey ansa pesin before e hear
    wetin di pesin wan tok—na mumu and
    shame for am.
14. Man spirit go make am endure wen he
    no-well, but who fit carry spirit wey don
    taya?
15. Di heart of pesin wey get-sense dey gada
    learning, and wise man ears dey fyne
    knowledge.
16. Pesin gift dey open way for am, and e go
    give am connection to bigmen.
17. Di first pesin wey judge mata dey be like
    sey e dey right, until anoda pesin come ask
    am question.
18. To throw coin dey settle mata, and e go
    make strong pipo wey wan fight
    demsef—dey on dia own lane.
19. Broda wey dey vex—dey hard to win
    pass strong city, and quarrel dey separate
    pipo like wen dem lock di gate of strong-
    house.
20. Wetin man dey tok nahin go make am
    belleful; di right words wey he tok—dey
    make am get yanfu-yanfu.
21. Di tongue get pawa of life and death, and
    those pipo wey love to tok, go chop di fruit of
    dia words.
22. Pesin wey fyne wife don fyne beta tin,
    and he go receive favour from Baba-God.
23. Poor man dey beg for mercy, but bigman
    dey ansa am in a rugged way.
24. Man wey get plenty padi must sabi rub-mind wit pipo, but e get padi wey dey close pass broda.