- Na inside you, Oh Baba-God, nahin I dey hide my head put; maka shame no
ever catch me; deliver me for inside you righteousness.
- Hear my word, save me sharp-sharp; make you be my rock wey I dey hide head
put, strong-house wey go save me.
- Since na you be my rock and strong-house, becos of your name make you lead
me and guide me.
- Free me from di trap wey badbelle pipo set for me, na you be my refuge.
- I commit my spirit for you hand; save me O Baba-God of truth.
- I no like pipo wey still dey hold useless idol; I trust in you Baba-God.
- I go dey glad con happy inside your love, you see my suffer-head and you know
di pain wey my soul dey go feel.
- You no let the enemy catch me, but you make me dey for where get space
- Sorry for me, Oh Baba-God, I dey inside yawa; my eyes dey pain me becos of
cry-cry, my soul and my body dey wit deep sorrow.
- Suffer-head wan finish my life and di cry-inside wan finish me; I no get power
again becos of suffer-suffer and my bone dey weak.
- Becos of my enemies by neighbors don hate me; and my padi dey fear
me—pipo dey run from me for street.
- Dem don fashi me like sey I don die; I con be like pot wey don break.
- I dey hear di bad-bad tins wey pipo dey tok about me; kitikiti dey for every
side of me; dem dey gather together for my matta con plan to kill me.
- But I dey trust you, Oh Baba-God, I go tok sey, “Na you be my God”
- My life dey for your hand; save me from my enemies and from those pipo wey
dey pursue me.
- Make your face shine upon your servant; save me for your love wey no dey
fail.
- Make shame no ever ever catch me, Oh Baba-God, I don cry out to you; make
shame catch wicked pipo and make dem lie down silent for grave.
- Silence dia lips wey dem take dey lie, naso dem go dey make-mouth wit
hatred dey tok anyhow against righteous pipo.
- See as your goodness great reach wey you carry give man as gift —wey you
don keep down for those pipo wey dey fear you, and wey hide dia head inside
you.
- Under the roof your house nahin you dey hide dem from the bad-bad tins wey
men dey do; for inside your house nahin you dey keep dem safe from pipo wey
dey lie for their head.
- Praise be unto Baba-God, he don show me hin ogbonge love wen I dey for di
city wey enemies don surround.
- As fear catch me, I con tok sey “I don cut comot from Baba-God face!” Upon
dat, you still sorry for me wen I call you for epp.
- Love Baba-God all una wey be hin holy-pipo! Na God dey protect faithful pipo,
but he go judge pipo wey dey make-mouth.
- Make una dey strong and make una get mind, everi-pesin wey hope in Baba-
God
Post Views: 43
