Hosea Chapter 3

Israel Go Go Back To Baba-God

1. Naso Baba-God tell me sey, “Go show your wife love again, even though anoda pesin love her, and she be ashawo. Love her just as Baba-God take love Isreal, even though dem dey turn follow oda gods, con love dia cake of dry-grapes (wey dem dey use for dia idol worship).
2. So I buy her wit fifteen silver coins, plus 150 kilograms of barley (di price wey dey dey sell ordinary slave).
3. Naso I con tell her sey, “You must live wit me for many days; you must no dey waka follow men or belong to anoda man, and I go do di same tin for you.”
4. Di pipo of Israel must live for many days wit no king, or prince, wit no sacrifice, wit no image, and wit-no priest-cloth or house-idols.
5. Las-las, di pipo of Israel go come back to fyne Baba-God wey be dia Oga, and king David wey be dia king. And dem go fear Baba-God and hin goodness for di last days.