Proverbs Chapter 16

Na Baba-God Dey Give Pesin Wetin To Tok

1. Man get plan for hin heart, but na Baba-
   God dey give am di correct ansa to tok.
2. All man way dey pure for hin eyes, but na
   Baba-God dey judge hin spirit.
3. Commit your business to Baba-God, and
   your plan go stand gidigbam.
4. Baba-God don make everitin for
   hinsef—even badbelle pipo dey wait to fall
   wen kasala go burst.
5. Any-pesin wey dey feel- big na tufiakwa to
   Baba-God, even if dem join dia head togeda,
   none of dem go escape wit-out punishment.
6. Na wit mercy plus faithfulness, pesin
   fit pay for sin; and na di fear of Baba-God dey
   make man komot from bad tin.
7. Wen Baba-God love man way, he go make
   even hin enemies make peace wit am.
8. E beta make you get small tin wit clean-
   hand, dan to get plenty moni wit ojoro.
9. Man get plan for hin heart, but na Baba-
   God dey tell am where he go waka go.
10. Oba lips na oracle, and hin lips no
    suppose judge wit ojoro.
11. Baba-God like correct measurement and
    balance, all di weight for di bag na hin work.
12. Na tufiakwa for oba to do wicked tins, na
    goodness dey make king-chair stand
    gidigbam.
13. Kings like pesin wey dey tok true; dem
    love pipo wey dey tok di right tins.
14. Wen king vex, e be like messenger of
    death, but wise man go cool am down.
15. Wen king face dey smile, e mean life; and
    hin favour be like las-las rain for raining
    season.
16. E beta make you get wisdom—dan make
    you get gold, e beta make you choose
    understanding—dan make you choose
    silver
17. Di highway of pesin wey get clean-hand
    na to komot from evil, any-pesin wey dey
    watch hin way, go dey safe.
18. Afta pesin carry shoulder up, las-las he
    go fall, and spirit wey dey feel-big—go soon
    fall.
19. E beta make pesin live simple life wit
    low-key pipo, dan to share evil moni wit pipo
    wey dey make-mouth.
20. Any-pesin wey dey hear word—wit
    sense, go see alubarika (blessings), and di
    pesin wey trust Baba-God go always dey
    happy.
21. Dem know wise pipo for dia
    understanding, and beta words dey promote
    learning.
22. Understanding na water of life wey dey
    flow to those pipo wey get am, but di
    correction of mumu pipo na yeye.
23. Wise man heart dey guide hin mouth, and
    e dey teach am how to sabi tok.
24. Beta words na honey wey dey sweet for
    di soul, and wey dey give good health to di
    bone.
25. Man get hin way, wey be like sey e dey
    right for hin eyes, but dat way dey lead to
    death las-las.
26. Pesin wey dey hustle, dey hustle for
    hinsef, na hin mouth wey dey hungry dey
    ginger am.
27. Evil man dey plan evil tins, and e dey for
    hin lips like faya wey dey burn.
28. Corrupt man dey cos kwanta, and tatafo dey separate correct padi.
29. Man wey like to shed blood dey tempt
    hin neighbour, con carry am enta bad way.
30. He dey close hin eyes to plan bad tin, and
    he dey run hin lips—to make evil come to
    pass.
31. White hair na crown of levels, you fit
    only get am from beta life.
32. Pesin wey no dey quick vex beta pass
    man wey get pawa; man wey dey control hin
    spirit—beta pass man wey fit control full
    city.
33. Dem don throw coin up, but na Baba-
    God go decide which side go face up or
    down.