- Oh my pipo, make una hear wetin I dey teach una; listen to di yarnings wey dey
comot from my mouth.
- I go open my mouth wit parables, I go tok plenty secret—tins from olden
days—
- wetin we don hear and wetin we know, wetin awa papa don yarn us.
- We no go hide am from una pikin; we go tell una pikin-pikin wetin Baba-God
don do wey we take dey make us cut-cap, hin power and all di elele tins wey he
don do.
5.
- so awa pikin-pikin-pikin go know am, even di pikin wey dem neva born, dem sef
go yarn dia pikin.
- So dem go trust Baba-God and no go fashi all di tins wey he don do, but dem go
do wetin he talk.
- Dem no go be like dia papa-papa-papa—generation wey get strong-head and
wey dey rebel, wey dia heart no loyal to Baba-God, wey dia spirit no dey faithful
to am.
- Di men of Ephraim vamuse even wit dia bow for di day of war;
- dem no gree keep Baba-God agreement and dem no gree do wetin Baba-God
tell dem to do.
- Dem forget wetin Baba-God don do, di elele wey he don show dem.
- He do miracles for dia papa front for di land of Egypt, for di area of Zoa.
- He divide di sea, con carry dem pass inside dey go; he make di water stand
gidigbam like wall.
- He guide dem wit di could for day and wit di light from di faya for night.
- He break di rock for desert con give dem water wey plenty like sea;
- from inside rock nahin he take form streams, con make water rush comot like
rivers.
- But dem no stop to commit sin, dem rebel against di Most high for inside
desert.
- Dem use dia koro-koro eyes dey test Baba-God, dey ask for wetin dem wan
chop.
- Dem tok wetin Baba-God no like, dem sey, “Baba-God go fit give us food for
inside desert?
- Wen hin nack di rock, wata rush out and stream flow brekete. But he go fit
give us food sef? He fit give hin pipo meat?”
- Wen Baba hear dem he con vex well-well, hin faya change am for Jacob, and
hin pkara for Israel,
- dem no believe Baba-God or trust sey he go free dem.
- Upon sey he give di sky wey dey for up hin command, and he open di door of
di heavens;
- mana fall from heaven like rain make hin pipo for chop, he give dem food
from heaven.
- Men con dey chop angel food; he give dem all di lem wey dem fit chop.
- He loose di east wind from heaven con lead di south wind go front.
- Meat throway meat from heaven for dem like dust, bird wey dey fly plenty
like sand-sand for beach.
- He make dem land for dia camp and everi-where for dia tent.
- Dem lem till dem no fit chop again, he don give dem wetin dem really want.
- But before dem chop for di food finish, even wen di food wey dem want still
dey for dia mouth,
- God con vex for dem; he kill di ones wey strong pass among dem, he cut down
di young men of Israel.
- Upon all dis, dem still continue to dey sin, upon all di wonders, dem no till
believe Baba-God.
- So he turn dem to born throway and he make oturugbeke full dia life.
- Any time wey Baba-God kill dem, dem go con dey fyne am; dem go con rush
go meet am again.
- Dem con remember sey na Baba-God be dia rock, sey na God Most High nahin
save dem.
- But naso dem go dey whyne am wit dia mouth, dey lie to am wit dia tongues;
- dem no dey loyal to am for dia heart, dem no dey faithful to hin agreement.
- Upon dat, he still sorry for dem, he forgive dia bad-bad sins and he no dabaru
dem. Many many times he no vex for dem and he know pkara finish for dem.
- He remember sey dem be flesh, like breeze wey dey blow g—wey no dey
come back.
- Many-many times dem rebel against Baba-God for inside di desert, and dem
make am vex for di desert!
- Everi-time—everi-time dem dey test Baba-God, dem dey make di Holy one of
Israel vex.
- Dem no remember hin power—di day wey he free dem from di pipo wey dey
oppress dem,
- di day wey hin display hin miraculous signs for Egypt, and he wonders for di
area of Zoan.
- He trun dia river to blood; dem no fit drink from di streams.
- He send plenty flies wey chop dia body, plus frogs wey cause katakata for
dem.
- He carry dia plant give grasshopper, and wetin dem produce give locust.
- He dabaru dia plants wit rain of ice block and dia sycamore-fig wit sleet.
- He use rain of ice block nack dia nama and lightening strick dia animals.
- He change am for dem like faya; he dey pkara, he dey vex, sote no-pesin fit
near am—plenty angles wey dey scata-scata.
- He prepare road for hin vex, and allow death swallow dem, and he allow
gbege nack dem.
- He kill all Egypt first pikin, di first fruit of manhoodfor di tent of ham.
- But he carry hin pipo come out like shepherd dey lead sheep, he carry dem
like sheep pass inside desert.
- He guide dem safetly so dat fear no catch dem, but water carry dia enemies.
- Naso he carry dem reach di border of hin Holy land, to di kontri for hill wey hin
right hand don take.
- He pursue nations comot for dia front, con give dem di land as inheritance; he
settle di tribes of Israel for dia house.
- But dem con dey test Baba-God, dem con rebel against di Oga pkatapkata;
dem no deo wetin hin tell dem.
- Like dia papa, dem dey disloyal and dem no get faith, dem dey unreliable like
bow wey don pkafuka.
- Dem make am vex wit dia levels, dem make am jealous wit dia idols.
- Wen Baba-God hear dem, vex con catch am; he con fashi Israel finish.
- He fashi di tabanacle of Shiloh, di tent wey he don setup among men.
- He let dem catch hin ark of hin might, and hin splendor enta di hands of hin
enemies.
- He give hn ppo to the sword; he vex well-well for hin inheritance.
- Faya burn dia young men, and no wedding song for dia fine chenkes.
- He allow dem kill hin pipo wit sword, and dia women wey dia husband pkeme
do fit cry.
- Naso Baba-God con wake up like sey he dey sleep, like a man wey dey wakeup
from hang over.
- He beat hin enemies back; he make shame catch dem forever.
- Naso he bone di tents of Joseph and he no choose di tribe of Ephraim;
- but he chose di tribe of Judah, Mount zion wey he love.
- He build hin holy-place like di height, like di earth wey hin make.
- He choose David hin servant con carry am from sheep house;
- from where he dey take care of sheep to be di shepherd of hin pipo Jacob, of
Israel hin inheritance.
- And David lead dem wit hin clean heart and wit hin hand wey get skill wella.
Post Views: 26
