Genesis Chapter 46

/ 14 Comments
Abeg share

Jacob Go Egypt

  1. So Israel enta road wit everitin wey he get, and wen he reach Beersheba, he offer sacrifice to di God of hin papa Isaac.
  2. Baba-God con follow Israel tok for vision for night, “Jacob! Jacob!” Jacob ansa, “Na me be dis.” Naso Baba-God tok sey,
  3. “Na me be Baba-God, di God of your papa-papa-papa, no fear to go Egypt, becos I go turn you to big nation for there.
  4. I go follow you go Egypt, and I go surely carry you come back again. And Joseph go dey wit you to close your eyes wit hin hand.”
  5. Naso Jacob komot from Beersheba, and all Israel pikin carry dia papa Jacob plus dia  pikin and dia wives for di moto wey Pharaoh send wit load to carry dem come back.
  6. Dem still carry dia animals, plus dia properties wey dem get for Canaan, naso Jacob and all hin pikin take enta Egypt.
  7. He carry hin sons follow-body, plus hin grandsons and hin daughters plus grand-daughters—all hin pikin nahin follow am enta Egypt.
  8. Na dis be di names of Israel pikin [Jacob and sons] wey go Egypt: Reuben wey be di firstborn of Jacob.
  9. Na dis be di sons of Reuben: Hanoch, Pallu, Hezron plus Carmi.
  10. Na dis be di sons of Simeon: Jemuel, Jamin, Ohad, Jakin, Zohar plus Shaul wey be di son of Canaan woman.
  11. Dis na di sons of Levi: Gershon, Kohath plus Merari.
  12. Dis na di sons of Judah: Er, Onan, Shelah, Perez plus Zerah [but Er and Onan bin die for di land of Canaan]. Na dis be di sons of Perez: Hezron plus Hamul.
  13. Na dis be di sons of Issachar: Tola, Puah, Jashub and Shimron.
  14. Na dis be di sons of Zebulun: Sered, Elon plus Jahee.
  15. Na dis be di sons wey Leah born for Jacob for Paddanaram, apart from hin daughter Dinah. All  dis Jacob sons plus daughters na thirty three.
  16. Na dis be di sons of Gad: Zephon, Haggi, Shuni, Ezbon, Eri, Arodi plus Areli.
  17. Na dis be di sons of Asher: Jimnah, Ishuah, Ishvi plus Beriah. Serah na dia sista. Na dis be di sons of  Beriah: Heber plus Malkiel.
  18. Na dis be di pikin wey Zilpha born for Jacob— Zilpha wey Leban give to hin daughter Leah. All  of dem na sixteen.
  19. Dis na di sons of Jacob wife Rachel: Joseph plus Benjamin.
  20. For Egypt, Asenath wey be di daughter of Potiphera di priest of On born Manasseh plus Ephraim for Joseph.
  21. Na dis be di sons of Benjamin: Bela, Beker, Ashbel, Gera, Naaman, Ehi, Rosh. Muppim, Huppim plus Ard.
  22. Na dis be di sons of Rachel wey she born for Jacob. All of dem na fourteen.
  23. Na dis be di son of Dan: Hushim.
  24. Na dis be di sons of Naphtali: Jahziel, Guni, Jezer plus Shillem.
  25. Na dis be di sons of Bilhah wey Leban give  hin daughter Rachel—all of dem na seven.
  26. All di pipo wey follow Jacob go Egypt—those  wey be hin family-pipo, apart from hin sons wives, all of dem na sixty six pipo.
  27. Wit di two sons wey dem born for Joseph for Egypt, all di members of Jacob family wey go  Egypt na seventy.

                    Jacob Settle Down For Goshen

28. Now Jacob send Judah for-front go meet Joseph—to tell am di road to Goshen. Wen dem reach di area of Goshen,

29. Joseph arrange hin horse-moto con go Goshen to meet hin papa Israel. As Jospeh just reach front of hin papa, he hug hin papa, con cry well-well.

30. Israel tell Joseph sey, “Now I don ready to die, since I don see you wit my korokoro eyes, sey  you still dey alive.”

31. Naso Joseph tell hin brodas and hin papa family sey,“I go go tell Pharaoh sey, ‘My brodas and my  papa family wey bin dey stay for Canaan don come meet me.

32. Di men be farmers, dem dey train animals, and dem carry dia animals come, plus dia malu and  everitin wey dem get.

33. Wen Pharaoh call una enta con ask, ‘Wetin be  una work?’

34. Make una ansa am sey, ‘We your servants don  dey train animals since we be small pikin, just like awa papa-papa-papa.’ Naso he go allow una stay for di area of Goshen, becos Egyptian no like to  dey train sheep as work.

Like this
Post Views: 130

14 Comments

Leave a Reply

Your email address will not be published. Required fields are marked *


Home

Sunday School

Daily Devotion

Pidgin Dictionary

Prayer Request