- For di producer of music. Dis na Psalm of David. Oh Baba-God, save me from evil men;
protect me from men wey like fight-fight,
- men wey dey plan evil for dia heart, and wey dey cause war everi day.
- Dia tongue sharp like snake mouth. Snake poison dey drop from dia lips.
- Oh Baba-God, guard me from di hands of di wicked pipo. Protect me from men wey like
blood, dem dey plan to make me fall.
- Men wey dey buga don set trap for me; dem don spread di rope of dia net for me, and dem
don set trap for where I dey waka pass.
- Oh Baba-God, I tok sey, “Na you be my God.” Hear my cry for mercy Oh Baba-God.”
- Oh Baba-God wey get full control, my strong saviour—wey dey cover my head wen fight dey.
- Oh Baba-God, no give wicked pipo wetin dem dey fyne; no let dia plan succeed, or dem go
dey make-mouth.
- As for di head of those pipo wey surround me, make di wahala wey dey dia mouth cover
dem.
- Make hot faya fall for dia head. Make dem fall inside faya, make dem fall inside hole of
portor-portor—and make dem no fit stand up again.
- Make pipo wey get bad-mouth no stand gidigbam for di land; make yawa pursue pipo wey
like blood.
- I know sey Baba-God go give justice to poor pipo, and fight for pipo wey no get shi-shi.
- Surely righteous pipo go praise your name, and di pipo wey get clean heart go stay wit you.
Post Views: 27
