Leviticus Chapter 14

Cleaning of Leprosy From Pesin

1. Baba-God con tell Moses sey,
2. “Na dis be di law for pesin wey get leprosy for di days of hin cleaning, wen dem carry am come meet di priest.
3. Make di priest go outside di camp to observe am. If di pesin don heal from di skin disease of leprosy,
4. di priest go tok sey make di pesin wey wan clean hinsef bring two clean birds wey dey alive, plus cedar wood, red thread, plus branch of hyssop.
5. Naso di priest go tok sey make dem kill one of di birds on top of fresh water for inside one clay pot.
6. He go con carry one of di birds wey dey alive, di cedar stick, di red rope, plus di hyssop branch, and he go shuuk dem inside di blood of di bird wey dem kill on top of di fresh water.
7. He go con sprinkle di pesin wey e wan clean from leprosy—seven times, con tok sey di pesin don clean. Naso he go release di bird wey dey alive for open field.
8. “Di pesin wey he wan clean must wash hin clothes, barb all hin hair, con baff wit water, so dat he go clean. Afta dis, he fit enta di camp, but he must stay outside hin house for seven days.
9. On di seventh day, he must barb all hin hair; he must shave hin head gorimakpa, hin bear-bear, hin eyebrows, plus he remaining hair for body. He must wash hin clothes, con baff wit water, and he go clean.
10. “On di eighth day, he must carry two male lambs plus one female lamb wey be one year old, and wey no get comma for body, wit 3kg of fine flour mix wit ororo—for seed offering, and one small cup of ororo.
11. Di priest wey go do di cleaning ritual go carry both di pesin wey he wan clean, and hin offering go meet Baba-God, for di door of di worship-place.
12. Naso di priest go take one of di male lamb, con give am as guilty offering, togeda wit di cup of ororo. He go con wave dem as wave offering to Baba-God.
13. Naso go he kill di lamb for di holy place, where dem take dey kill di sin offering plus burnt offering. Just like di guilty offering, di sin offering sef belong to di priest; na di most holy.
14. Make di priest take some of di blood of di guilty offering, con put am on di end of di right ear of di pesin wey he dey clean, for di big-finger of hin right hand, and di big-finger of hin right leg.
15. “Naso di priest go go carry some of di ororo, con pour am put for hin own left hand.
16. He go shuuk hin right finger inside di ororo wey dey for hin left hand, con sprinkle some of dem wit hin finger seven times for Baba-God front.
17. So di priest go take di remaining ororo wey dey for hin hand, con put am on di end of di right ear, on di big-finger of di right hand, and di big-finger of di right leg—of di pesin wey he dey clean.
18. Di priest go con put di rest ororo wey dey for hin hand, on di head of di pesin wey he dey clean. Naso di priest go take clean di pesin sin for Baba-God front.
19. “Den di priest go sacrifice di sin offering, con sacrifice for di sin of di man wey he dey clean. Afta dat, di priest go kill di burnt offering,
20. con put am for di altar, togeda wit di seed offering. Naso di priest go con sacrifice for hin sin. And di pesin go clean.
21. “But if di pesin na poor man wey no get moni to buy all dis tins, he must take one lamb as guilty offering, wey he go raise up as special offering for hin sin—to make am pure. Di pesin must still bring 1.89 liters of fine flour mix wit ororo, as seed offering [meat offering], wit one cup of ororo;
22. Plus two doves or two young pigeons wey he moni fit buy, one for sin offering and di oda one na for burnt offering.
23. “On di eighth day, he must carry dem come meet di priest for Baba-God front—for door of di worship-place—for hin cleaning.
24. Di priest go take di lamb of di guilty offering, wit di ororo, con wave dem as wave offering to Baba-God.
25. He go kill di lamb for di guilty offering, con carry some of e blood. He go put am for di end of di right ear, di big-finger of di right hand, plus di big-finger of di right leg of di pesin wey he dey clean.
26. Di priest go con pour some of di ororo for hin left hand.
27. He go shuuk hin right finger inside di ororo wey dey for hin left hand, con sprinkle some of am seven times for Baba-God front.
28. Naso di priest go use some of di ororo wey dey for hin hand on top of di end of di right ear, di big-finger of di right hand, plus di big-finger of hin right leg—of di pesin wey he dey clean, and for di place of di blood of di guilty offering.
29. Di priest go con put di remaining ororo wey dey for hin hand, on di head of di pesin wey wan dey clean, naso di priest go take clean di pesin sin for Baba-God front.
30. Naso he go sacrifice di doves or di young pigeons wey di pesin moni fit buy.
31. One as sin offering and di oda one as burnt offering, togeda wit di seed offering. Naso di priest go take sacrifice for di sin of di pesin wey he dey clean for Baba-God front.”
32. Na dis be di law for any pesin wey get leprosy and wey no get enuff moni to do di normal offering wey go make hin body clean.

Di Cleaning of House Wey Leprosy Dey

33. So Baba-God tok to Moses and Aaron sey,

34. “Wen una enta di land of Canaan, wey I dey give una as una property, and I con put leprosy for di house of dat land wey I don give una as una property,

35. di owner of di house must go tell di priest sey, ‘I don see sometin wey be like leprosy for my house.’

36. Di priest go con tok sey make dem pack everitin komot from di house before he go come see am—so dat everitin wey dey for inside di house no go corrupt, and afta dat di priest go enta go see di house.

37. He go observe di leprosy for di wall, and if true-true di disease dey for di wall of di house. If he see green and red marks inside di wall, and e be like sey di disease don enta inside di wall,

38. Di priest go komot from di house and from di doormot of di house, con lock di house for seven days.

39. On di seventh day, di priest go come back to come look di house. If di leprosy don spread for di walls of di house,

40. naso di priest go tok sey make dem break di part of di wall wey di disease don affect, con throway dem outside di city for place wey no clean.

41. Afta dat, dem must scrape all di wall of di house, and dem go throway di plaster for place wey no clean outside di city.

42. So dem go use new blocks take replace di old ones, wit new clay to plaster di house.

43. “If di disease show-face again afta dem don break some block from di walls, scrape di house, con plaster am,

44. Di priest go go observe am, and if di leprosy don spread for di house, na leprosy wey dey spread; di house no clean be dat.

45. Dem must scata di house—di stones, timbers, plus all di plaster—and make dem carry dem komot from di city, con throway am for place wey no clean.

46. And any pesin wey enta di house afta dem lock am no go clean till evening.

47. Any pesin wey sleep or chop for inside di house must wash hin clothes.

48. “But if di priest come observe di house, con see sey di leprosy neva spread afta dem platser di house, he go tok sey di house clean, becos di disease don go.

49. To clean di house, he go carry two birds, plus cedar wood, red thread, and hyssop.

50. He go kill one of di birds on top of fresh water wey dey inside clay pot.

51. Naso he go take di cedar wood, di hyssop, di red thread, di bird wey dey alive, and he go shuuk dem inside di blood of di bird wey he kill plus di fresh water, con sprinkle di house seven times.

52. He go clean di house wit di blood of di bird, di fresh water, di bird wey dey alive, di cedar wood, di hyssop, plus di red rope.

53. Den he go release di bird wey dey alive for open field wey dey outside di city. Naso di priest go take clean di house, and di house go clean.”

54. Na dis be di law for any skin disease of leprosy, and sore,

55. for leprosy wey dey for pesin cloth or house,

56. and for skin wey swell up, for rashes or light spot for skin:

57. to know if e clean or not. Na dis be di law for leprosy.