Psalm Chapter 6

Prayer For Mercy Wen Yawa Gas

1. For di music producer. Play am wit
   music instrument wey get string. Harp wey
   get eight strings. Dis na Psalm of David. Oh
   Baba-God, no punish me as you dey para, or
   correct me as your vex dey hot.
2. Baba-God sorry-for me, I no- strong; Oh
   Baba-God, heal me, my bones dey shake wit
   fear.
3. My soul dey face serious yawa. But you,
   oh Baba-God, how long?
4. Chai Baba-God, turn save my soul; chai, save my life—becos you dey sorry-for pesin.

5. No-pesin fit remember you wen e don
   kpeme. Who fit tank you for inside grave?
6. I don taya to dey cry; for night I dey cry
   river on top my bed—con soak my pillow
   wit water from my eyes.
7. My eyes dey pain me becos of too much
   cry-cry; my eyes dey close becos of my
   enemies.
8. Oya komot for my side, all of una wey
   dey do evil tins, becos Baba-God don hear
   my voice as I dey cry.
9. Baba-God don hear my cry for epp;
   Baba-God go hear my prayer.
10. Make shame catch all my enemies, and
    make wahala burku for dia head; make dem
    turn back, and make shame catch dem now-now-now.