- Make una sing wit joy to Baba-God, righteous pipo; e make sense make pipo
wey get clean hand praise Baba-God.
- Praise Baba-God wit harp; compose music for God wit di ten stringed lyre.
- Sing new song to Baba-God; use your skill play music for am and shout wit joy.
- Baba-God word dey right and true; he dey faithful for everitin wey he dey do.
- Baba-God love righteousness and justice; di earth brekete wit hin love wey no
dey ever fail.
- Na Baba-God word nahin make di heavens, all di stars na by the breathe of hin
mouth.
- Baba-God don gather all di water of di sea inside calabash. He put the deep
inside storehouses.
- Make everi-pesin wey dey for dis earth fear Baba-God. Make everi-pesin
respect Baba-God.
- He tok and wetin he tok don happen. He order tins and di tins wey he order
happun.
- Baba-God dey scata di bad plans of di nations; he dabaru dia idea.
- But Baba-God plan dey stand gidigbam forever, and di idea for hin mind go
stand for all generations.
- Blessed na di nation wey make Baba-God dia Oga pkatapkata, di pipo he dey
choose for hin inheritance.
- From heaven Baba-God dey look down and see everi man;
- he dey watch all of una for earth from where he dey—
- God wey form everi body heart, wey dey reason everitin wey dem dey do.
- No king dey safe becos of how hin army and weapon plenty reach; no warrior
dey survive by hin own energy.
- No waste your time dey believe sey na your horse go save you; even as e get
power reach, e no fit save pesin.
- But Baba-God eyes dey watch all those pipo wey dey fear am and those pipo
wey put dia hope inside hin love wey no dey fail,
- to save dem from death and keep dem alive wen hungry full town.
- We dey wait for Baba-God wit hope, nahin be my epp and nahin dey guard
me.
- Nahin dey make awa heart dey jolly and we trust Baba-God holy name.
- May your love wey no dey fail dey wit us, Oh Baba-God, even as we dey put
awa hope inside you.
Post Views: 21
