- I wait patiently for Baba-God, he look me con hear my cry.
- He carry me comot from inisde hole wey dror dey, comot from portor-portor
and mud, he con put my leg ontop rock, con give me strong place wey I go stand.
- He put new song for my mouth, I go use hymn praise hin name. Many pipo go
see con fear, con put dia faith for Baba-God.
- Blessed na di man wey make Baba-God hin trust, wey no dey look pipo wey dey
make-mouth, wey no dey look pipo wey turn dey serve foreign gods.
- Di wonders wey you don do brekete. No-pesin fit count di tins wey you plan for
us; if I wan yarn and tok about dem, dem too plenty for me to tok.
- Sacrifice and offering wey you no really want, but you don shuuk my ears;
burnt offering plus sin offering wey you no really want.
- I con tok sey, “Na me be dis, I don come—dem write about me for inside di
book.
- I really wan do your will Oh Baba-God; your law dey inside my heart.”
- I go tok about righteousness for where God-pipo gather; Baba-God you know
sey I no go close my lips.
- I no dey hide your righteousness for my heart; I dey yarn about your
faithfulness and salvation. I no hide your love and truth from your pipo wey
gather.
- No hide your mercy from me Oh Baba-God; make your love and your truth
always protect me.
- Plenty-pleny palava wey I no fit count don round me; my sins don cover me,
and I no fit see. My sins plenty pass the hair wey dey my head. And e be like sey
my heart wan fail.
- Make your body sweet you to save me. kiakia come epp me.
- Make shame and kata-kata catch all those pipo wey want make I pkeme.
Disgrace all those pipo wey want be I fall down.
- Make all those pipo wey dey tell me sey, “Aha! Aha!” dey surprise for di
shame wey go catch dem.
- But make all those pipo wey fyne you happy well-well. May all those pipo wey
like the wey you take save us always tok sey, “Make Baba-God get level!”
- But I poor and I no get shi-shi, make Baba-God tink about me. Na you be my
epp and na you dey save me; O Baba-God, no delay.
Post Views: 25
