Job Chapter 9
Job Ansa
- So Job ansa, con tok sey,
- “I know sey naso e true-true be; but how man go fit pure for Baba-God eyes?
- If pesin wan drag mata wit Baba-God, he no go fit ansa Baba-God even once inside hundred times?
- He wise for hin heart, and he get pawa well-well; who don show hin cononut-head for Baba-God, con prosper?
- Before dem know, he dey komot mountains; and he dey turn dem wen he dey vex.
- He dey shake di earth komot from her place, and di pillar go dey shake.
- He dey command di sun, a di sun no go gree rise; and he go hide di stars.
- Na only him spread di heavens, and he march di waves of di big-river.
- Nahin make all di stars—di Bear* plus Orion*, di Pleiades* and all di group of stars wey dey for di south sky.
- He dey do ogbonge tins wey pipo neva see. Yes, and he dey do miracles wey we no fit count.
- See, he dey pass near me, and I no fit see am; he dey waka pass me, and I no fit notice am.
- See, he dey take tins and who fit stop am? Who fit tell am sey—‘Wetin you dey do?
- Baba-God no go stop to dey vex; di supporters of Rehab* wey dey feel-big—go dey under am.
- So who I be, wey I go try to ansa Baba-God, or choose words to reason wit am?
- Even though I get clean-heart, but I no fit ansa Baba-God. I only fit beg my judge.
- If to sey I bin call and he con ansa me; I for no believe sey he don hear my voice.
- He dey break me wit heavy-breeze, and he make my wounds plenty for no reason.
- He no let me breath, but he make my life brekete bitter tins.
- If na pawa I wan tok about—see, he strong well-well. If na justice mata, who fit carry am go court?
- If I prove sey I dey right, my own mouth go condemn me, if I tok sey I dey perfect, e go confam sey my way na bend-bend way.
- I dey innocent, but e no mean anytin to me—I hate my life.
- Both innocent and wicked pipo—all of dem na di same to Baba-God, nahin make I tok sey, ‘He dey scata both innocent pipo and wicked pipo.’
- Wen disease dey spread, he dey laff wen innocent pipo dey suffer.
- Di whole earth dey for wicked pipo hand, and Baba-God dey blind di judges eyes. If no be hin dey go am, who con dey do am?
- My life dey move fast-fast pass pesin wey sabi run. My life dey fly komot wit-out happiness.
- Dem dey waka pass like fast ships, like eagle wey dey rush go hunt.
- If I tok sey I go fashi my complains, to komot my sadness con calm down,
- I go still fear all di pains, becos I no sey you no go count me as innocent pesin.
- Since I be wicked pesin, why I con dey try in vain?
- If I wash mysef wit snow water, con make my hand clean pass before,
- but you go still throway me for gota, and even my own cloth go hate me.
- See, he no be man like me wey I fit ansa am, or so dat we go fit meet to settle awa mata.
- If only pesin dey wey fit settle awa mata, pesin wey fit bring us togeda.
- Make he carry hin punishment komot from me, and make hin fear no make my mind dey cut.
- Den I go tok, and I no go fear am, but no be so for me.